ژنانی كوردستان شانبەشانی پیاوان لە بازاڕی كاردان

لاڤە كوردە

 

زیاتر لە چوار ساڵە قەیرانی دارایی بەرۆكی هەرێمی كوردستانی گرتوە وكاریگەری لەسەر تەواوی چینەكانی كۆمەڵگە دروستكردوە، ژنانیش بێبەش نین لەو قەیرانە، و بۆدابینكردنی بژێوی ژیانیان ڕوویان لە كاركردن كردوە لەناو بازاڕدا . پێشتر ئەوەی دەبینرا لە بازاڕدا زۆربەی پیاوبوون دەشتوانین بڵێین تەنها پیاوان بون، بەڵام لەم سێ ساڵەدا ژنان بازاڕی كاریان ئاوەدان كردۆتەوە كە بەشێكیان لە ڕێگەی كاری دەستی خۆیانەوەیە . لە ئێستادا ژنان شانبەشانی پیاوان لە كەرتەكانی وەبەرهێنان و بیناسازیی و ئارایشتگەكانی جوانكاری كاردەكەن، و لەو رێگەیەوە بژێوی خۆیان و خێزانەكانیان دابین دەكەن . یەكێك لەو ئافرەتانەی كە سەرقاڵی كاری دەستییەو ڕۆژانە فرۆشێكی زۆری هەیە، خاتوو (شانۆ ئیسماعیلە) وتی: لەگەڵ خوشكەكەم بە ناوی (شناو ئیسماعیل) سەرەتا وەك حەزێك بۆ كارەكە دواتر بۆ بژێوی ژیان دەستمان بەكاركردن كرد، ئێمە سەرقاڵی ئیشی دەستین وەك چنین و دروستكردنی كەلوپەلی تایبەت بە منداڵانی تازە لەدایك بو یاخود بۆ ئاهەنگی رۆژی لەدایكبونی مندالان. وتیشی: خەڵكانێكی زۆر پێشوازی لەو كارەیان دەكەن و شتەكانیان دەكڕن. ئەم دوو خوشكە لە فەیسبوك و ئینستاگرام بە ناوی (ئیشی دەستی ژیلان) پەیجی تایبەت بەخۆیان هەیە ، ئیشەكانیان دەخەنە ڕوو ولەو ڕیگەیەوەش كڕیاری زیاتر بۆ بەرهەمەكانیان دەستەبەر دەكەن. خاتوو هیرۆ كە ئەویش ژنێكی ئازایە ولە زۆر شوین كاری كردوە باسی خۆی دەكات ودەڵێت: من لەدایكبووی 1984 م خاوەنی سێ منداڵم ، من كاری چنین دەزانم بۆ ماوەیەك لەماڵەوە ئەو كارەم دەكرد بۆ خزم وبرادەر ودراوسێ، بەڵام ئەو كات فەیس بوك وانستغرام وئەو شتانە نەبوون و بە زەحمەت بازاڕم بۆ شتەكانم دەدۆزییەوە، بۆیە بریاڕم دا لەدەرەوەی ماڵەوە كاربكەم وهاوكاری مێردەكەم بكەم، ماوەیەك لە حانوتی قوتابخانەیەك كارمان دەكرد پێكەوە، بەڵام ئێستا بۆ خۆم لە كافتریای یەكێك لە دەزگا رۆژنامەوانییەكان كار دەكەم وشەوانیش خواردن بۆ مێردەكەم دروست دەكەم بۆ حانوتی قوتابخانەكە، وهەندی جاریش لەسەر داوای خوشك وبرادەرو وكەسە نزیكەكانم شتیان بۆ دەچنم. من هەست بە شانازی دەكەم بەوەی كاردەكەم شان بە شانی مێردەكەم ،دڵخۆشیشم لەم دەزگایەی كاریشی لێدەكەم ژنان دەبینم هەموو خاوەن كارن ووەكو من بۆ بژێوییەكی باشتر بۆ خۆیان ومال ومنداڵیان كار دەكەن. ئەوەی پێویستە بوترێت ئەوەیە كە ئیتر ژنان ئەبێت ئاڕاستەی كاركردنیان لەو قاڵبە رزگار بكەن، كە كەی قەیران وناچاری ژیان تەنگی پێهەڵچنین، ئیتر ئەوان دەست بە كاركردن بكەن. ژنان پێویستە بیر لەوەبكەنەوە كەكاركردن پێویستییەكی ژیانەودەبێت پشت بەداهات و توانای خۆیان ببەستن نەك لەبەر ئەوەی ئێستا قەیرانی داراییەو كاركردن بەڕەوا ببینن، كەبارودۆخەكە ئاسایی بووەوە ئیتر ئەوانیش بێخەم لێی دانیشن، چاوەڕوانی پیاو یان برا بن بیانژێنن.

 

 

Show More

Related Articles

error: كليكى لاي راست لە كارخراوە !!
Close